தமிழ்நாட்டை போதைப் பொருட்கள் இல்லாத மாநிலமாக மாற்றும் நோக்கில் “போதைப் பொருள் இல்லா தமிழ்நாடு” என்ற பெயரில் புதிய இயக்கத்தை முதலமைச்சர் விஜய் துவக்கி வைத்துள்ளார். சென்னையில் நடைபெற்ற இந்த நிகழ்ச்சியில் ஆயிரக்கணக்கான மாணவர்கள் மற்றும் காவல்துறை அதிகாரிகள் கலந்துகொண்டனர். மேடையிலிருந்து மாணவர்கள் நிறைந்த அரங்கை நோக்கி கை காட்டி முதலமைச்சர் உரையாற்றிய காட்சி கவனத்தை ஈர்த்தது.
இந்நிகழ்ச்சியில் மாணவர்களுடன் இணைந்து போதைப் பொருட்களை முற்றிலும் தவிர்ப்பதாக முதலமைச்சர் விஜய் உறுதிமொழி ஏற்றுக்கொண்டார். “எல்லாரும் எப்படி இருக்கீங்க.. உங்களை எல்லாம் பாத்ததுல ரொம்ப சந்தோஷம்” என மாணவர்களை நோக்கி அன்பான வார்த்தைகளுடன் தொடங்கிய அவரது உரை, இளைய தலைமுறையை போதைப் பழக்கத்திலிருந்து பாதுகாக்க வேண்டியதன் அவசியத்தை வலியுறுத்தியது.
பள்ளி மற்றும் கல்லூரி மாணவர்கள் மத்தியில் போதைப் பொருள் பயன்பாடு அதிகரித்து வருவது குறித்த கவலைகளுக்கு மத்தியில், இந்த இயக்கம் தொடங்கப்பட்டிருப்பது முக்கியத்துவம் பெறுகிறது. காவல்துறை அதிகாரிகளும் இந்நிகழ்ச்சியில் பங்கேற்று, போதைப் பொருள் கடத்தல் மற்றும் விற்பனையை தடுக்கும் நடவடிக்கைகளுக்கு ஆதரவு தெரிவித்தனர்.
இந்த இயக்கம் தமிழ்நாடு முழுவதும் பள்ளி, கல்லூரிகள் மற்றும் பொது இடங்களில் விழிப்புணர்வு பரப்பும் நடவடிக்கைகளுடன் தொடரும் என எதிர்பார்க்கப்படுகிறது. முதலமைச்சர் விஜயின் இந்த முன்முயற்சி, சமூக ஊடகங்களில் பரவலான வரவேற்பையும் கவனத்தையும் பெற்றுள்ளது.
