தமிழக முதல்-அமைச்சர் ச. ஜோசப் விஜய், நாளை (10.07.2026, வெள்ளிக்கிழமை) கரூர் மாவட்டத்திற்கு உத்தியோகபூர்வ வருகை
தரவுள்ளார். முதல்வராகப் பொறுப்பேற்ற பிறகு அவர் கரூருக்குச் செல்வது இதுவே முதல் முறை என்பது குறிப்பிடத்தக்கது.
இந்த வருகையின்போது, கரூர் கூட்ட நெரிசல் சம்பவத்தில் உயிரிழந்தவர்களின் குடும்பத்தினர் மற்றும் பாதிக்கப்பட்ட
பயனாளிகளுக்கு, பல்வேறு அரசுத் துறைகளின் கீழ் பணியாற்றும் வகையில் 32 நபர்களுக்கு கருணை அடிப்படையில் பணி நியமன
ஆணைகளை முதல்வர் நேரடியாக வழங்க உள்ளார்.
நிகழ்ச்சி நிரல் நிகழ்ச்சி நிரல்
காலை 11 மணிக்கு விமானம் மூலம் திருச்சிக்குப் புறப்படும் முதல்வர், அங்கிருந்து சாலை வழியாக கரூர் வந்தடைவார்.
வழிநெடுகிலும் கட்சி தொண்டர்கள் மற்றும் பொதுமக்களால் அவருக்கு உற்சாக வரவேற்பு அளிக்கப்பட உள்ளது.
கரூர்–சேலம் பைபாஸ் சாலையில் அமைந்துள்ள அட்லஸ் கலையரங்க மைதானத்தில் நடைபெறும் மக்கள் சந்திப்பு நிகழ்ச்சியில்
முதல்வர் சிறப்புரையாற்றுவார். இங்கு சுமார் 5,000 பேர் பங்கேற்கும் வகையில் ஏற்பாடுகள் செய்யப்பட்டுள்ளன.
தொடர்ந்து மாவட்ட ஆட்சியர் அலுவலக வளாகத்தில் நடைபெறும் அரசு நிகழ்ச்சியில், 32 பேருக்கான பணி நியமன ஆணைகள்
வழங்கப்படும்.
ரூ.1,700 கோடி தொழிற்சாலைக்கு அடிக்கல் ரூ.1,700 கோடி தொழிற்சாலைக்கு அடிக்கல்
இதே நிகழ்ச்சியில், கரூர் மாவட்டம் கிருஷ்ணராயபுரம் ஊராட்சி ஒன்றியம், மனவாசி பகுதியில் தோல் அல்லாத (Non-Leather)
காலணிகளை உற்பத்தி செய்யும் புதிய தனியார் தொழிற்சாலைக்கு முதல்வர் அடிக்கல் நாட்டவுள்ளார். ரூ.1,700 கோடி முதலீட்டில்
அமையவுள்ள இந்த தொழிற்சாலை மூலம் சுமார் 13,500 பேருக்கு வேலைவாய்ப்பு கிடைக்கும் என எதிர்பார்க்கப்படுகிறது.
பின்னணி: கரூர் கூட்ட நெரிசல் சோகம் பின்னணி: கரூர் கூட்ட நெரிசல் சோகம்
கடந்த 2025 செப்டம்பர் 27ஆம் தேதி, தமிழக வெற்றிக் கழகத்தின் சார்பில் கரூரில் நடைபெற்ற பிரசாரக் கூட்டத்தில்,
அக்கட்சியின் தலைவரும் தற்போதைய முதல்வருமான விஜய் பங்கேற்ற போது ஏற்பட்ட பயங்கர கூட்ட நெரிசலில் 41 பேர்
உயிரிழந்தனர். 100க்கும் மேற்பட்டோர் படுகாயமடைந்தனர். இந்த சம்பவம் தொடர்பான வழக்கு, உச்சநீதிமன்ற உத்தரவின்
பேரில் மாநில காவல்துறையிடமிருந்து சி.பி.ஐ.க்கு மாற்றப்பட்டது. இந்த வழக்கு வரும் ஜூலை 13ஆம் தேதி உச்சநீதிமன்றத்தில்
விசாரணைக்கு வரவுள்ளது.
அரசின் நிவாரண நடவடிக்கை அரசின் நிவாரண நடவடிக்கை
கூட்ட நெரிசலில் பாதிக்கப்பட்ட குடும்பங்களுக்கு பொருளாதார பாதுகாப்பு அளிக்கும் நோக்கில், தமிழக அரசு கருணை
அடிப்படையிலான பணி நியமன விதிகளின் அடிப்படையில் இந்த ஆணைகளை வழங்குகிறது. வருவாய்த்துறை, பள்ளிக்கல்வித்துறை,
கூட்டுறவுத்துறை உள்ளிட்ட பல்வேறு அரசுத் துறைகளில் இளநிலை உதவியாளர் பணிகளுக்கான நியமனங்கள் இதில் அடங்கும்.
